ຈັນຍາບັນໃນການເຮັດວຽກກັບສັດ
ແລະ ເປັນຫຍັງ LCTW ຈຶ່ງມີຄວາມແຕກຕ່າງ
ສູນອະນຸລັກພັນສັດປ່າຫຼາຍແຫ່ງໃນອາຊີຕາເວັນອອກສ່ຽງໃຕ້ມີການໃຫ້ປະສົບການໃຫ້ອາສາສະໝັກ ໂດຍທ່ານສາມາດອຸ້ມ ຫລື ກອດສັດໄດ້.
ການຂີ່ ຫລື ອາບນ້ຳໃຫ້ຊ້າງ ແລະ ກອດລີງ: ປະສົບການເຫຼົ່ານີ້ເບິ່ງຄືວ່າມີຜົນດີ ແລະ ຈະເກີດຜົນປະໂຫຍດຮ່ວມກັນ ແຕ່ຄວາມຈິງແລ້ວກໍ່ບໍ່ໄດ້ເປັນແບບນັ້ນ.
ເຖິງແມ່ນວ່າພຶດຕິກຳບາງຢ່າງຈະເປັນທຳມະຊາດ ເຊັ່ນ: ຊ້າງອາບຂີ້ຕົມ ແຕ່ຊ້າງກໍ່ບໍ່ຄຸ້ນເຄີຍກັບການກະທຳແບບນັ້ນຮ່ວມກັບເພື່ອນມະນຸດທີ່ບໍ່ຮູ້ຈັກ. ຖ້າຊ້າງຕ້ອງອາບນ້ຳກັບນັກທ່ອງທ່ຽວ ຜູ້ລ້ຽງດູ ຫລື ຄວນຊ້າງຈະຕ້ອງຄວບຄຸມຊ້າງຢ່າງຕໍ່ເນື່ອງ ເພື່ອຄວາມປອດໄພຂອງຄົນ. ນີ້ຈະປ່ຽນສິ່ງທີ່ຊ້າງຕ້ອງການໄປເປັນສິ່ງທີ່ນັກທ່ອງທ່ຽວຕ້ອງການຈາກປະສົບການດັ່ງກ່າວ.
ຊ້າງມັກຈະລະມັດລະວັງຕົວເມື່ອຢູ່ໃກ້ກັບຄົນທີ່ບໍ່ຮູ້ຈັກ ແລະ ຈະລະມັດລະວັງຕົວບໍ່ໃຫ້ຄົນເຂົ້າຫາ ຫລື ທຳຮ້າຍພວກມັນ. ໝາຍຄວາມວ່າຊ້າງຕ້ອງຕື່ນຕົວ ແລະ ລະມັດລະວັງກ່ຽວກັບພຶດຕິກຳຂອງມັນ ແທນທີ່ຈະເປັນກິດຈະກຳຜ່ອນຄາຍໃຫ້ພວກມັນ ແຕ່ເຮັດໃຫ້ຊ້າງເກີດຄວາມກົດດັນທີ່ບໍ່ສົມຄວນ.
ມີຫຼາຍຄຳຖາມທີ່ສຳຄັນທີ່ທ່ານຄວນຖາມກ່ອນຈະເລືອກບ່ອນໃຊ້ເວລາ ແລະ ເງິນຫາຍາກຂອງທ່ານ
-
ສັດທີ່ຖືກ “ກູ້ໄພມາ” ຖືກລ້ຽງໄວ້ຢ່າງບໍ່ມີກຳນົດ ເພື່ອສະແຫວງຫາຜົນກຳໄລບໍ?
-
ມີມາດຕະການບຳບັດ-ຟື້ນຟູ, ປ່ອຍ ຫລື ຂະຫຍາຍພັນທີ່ຖືກຕ້ອງຕາມຫຼັກຈັນຍາບັນບໍ?
-
ການປະຕິສຳພັນຂອງທ່ານເຮັດໃຫ້ສັດປ່າມີພຶດຕິກຳທີ່ບໍ່ເປັນທຳມະຊາດບໍ?
-
ສັດຕ່າງໆຖືກນໍາມາວາງສະແດງ ເພື່ອດຶງດູດເອົານັກທ່ອງທ່ຽວລາຄາເທົ່າໃດ?
-
ເງິນຂອງທ່ານຖືກໃຊ້ໄປໃສແດ່?
ສະຖານທີ່ອະນຸລັກພັນສັດປ່າທີ່ມີຊື່ສຽງສາມາດຕອບຄຳຖາມເຫຼົ່ານີ້ໄດ້ ແລະ ນັ້ນກໍ່ເປັນສິ່ງທີ່ດີ! ແຕ່ຖ້າສະຖານທີ່ທ່ານໄປຢ້ຽມຊົມບໍ່ສາມາດໃຫ້ຄຳຕອບທີ່ໜ້າພໍໃຈໄດ້ ກໍ່ຄວນພິຈາລະນາການຢ້ຽມຊົມຂອງທ່ານໃໝ່.
ແມ່ນຫຍັງເຮັດໃຫ້
LCTW ມີຄວາມແຕກຕ່າງ?
ຢູ່ທີ່ LCTW ພວກເຮົາມອບປະສົບການທີ່ເປັນຈັນຍາບັນ ແລະ ຍືນຍົງ ໂດຍມີນະໂຍບາຍບໍ່ສຳຜັດສັດຢ່າງເຂັ້ມງວດ.
ຍ້ອນຫຍັງ?
ຍ້ອນວ່າພວກເຮົາມີເປົ້າໝາຍຈະປ່ອຍສັດທີ່ພວກເຮົາກອບກູ້ມາກັບຄືນສູ່ທຳມະຊາດໃຫ້ຫຼາຍທີ່ສຸດເທົ່າທີ່ຈະເຮັດໄດ້ ແລະ ເພື່ອໃຫ້ສັດສາມາດຢູ່ລອດໄດ້ ມັນຕ້ອງມີສັນຊາດຕະຍານທີ່ເປັນທຳມະຊາດ.
ໝາຍຄວາມວ່າໃຫ້ສັດມີການລະມັດລະວັງມະນຸດ ແລະ ບໍ່ເຂົ້າໃກ້ມະນຸດ ເພື່ອຫາອາຫານ ຫລື ຄວາມຮັກ. ການເຊື່ອມໂຍງກັບມະນຸດ ໝາຍຄວາມວ່າເມື່ອສັດຖືກປ່ອຍກັບຄືນສູ່ທຳມະຊາດ ພວກມັນມີແນວໂນ້ມສູງທີ່ຈະອອກມາຊອກຫາມະນຸດ ແລະ ສຸດທ້າຍກໍ່ສິ້ນສຸດ ໂດຍການຕົກເປັນເຫຍື່ອການຄ້າສັດປ່າທີ່ຜິດກົດໝາຍອີກຄັ້ງ.
ແລ້ວສັດປ່າທີ່ອາໄສຢູ່ໃນສູນຂອງພວກເຮົາທີ່ບໍ່ສາມາດປ່ອຍຄືນສູ່ທຳມະຊາດແດ່ຈະເຮັດແນວໃດ? ສັດຈຳພວກນີ້ມີບົດບາດສຳຄັນໃນການສອນພຶດຕິກຳທີ່ເປັນທຳມະຊາດໃຫ້ກັບສັດໂຕໜຸ່ມນ້ອຍທີ່ໄດ້ຮັບການກອບກູ້ມາ ເພື່ອໃຫ້ມີອະນາຄົດທີ່ສົດໃສໃນການປ່ອຍກັບຄືນສູ່ທຳມະຊາດ ແລະ ການປ່ອຍໃຫ້ສັດປ່າທຸກໂຕທີ່ຢູ່ໃນສູນນີ້ໄດ້ໃຊ້ຊີວິດຕາມທຳມະຊາດຖືເປັນສິ່ງສຳຄັນທີ່ສຸດສຳລັບພວກເຮົາ.
ສະນັ້ນ, ການຮັກສາສັນຊາດຕະຍານຂອງສັດປ່າຈຶ່ງເປັນສິ່ງສຳຄັນສຳລັບການປົກປັກຮັກສາສັດປ່າ ແລະ ຊີວິດການເປັນຢູ່ຂອງສັດ. ສັດບໍ່ຄວນເຮັດຫຍັງເລີຍ ນອກຈາກເປັນສັດຕາມກຳນົດເວລາຂອງມັນ.
ພວກເຮົາຍັງມີນະໂຍບາຍທາງໂຊຊ່ຽວມີເດຍຢ່າງເຂັ້ມງວດ ເຊິ່ງບໍ່ອະນຸຍາດໃຫ້ອາສາສະໝັກຂອງພວກເຮົາແຊຣ໌ຮູບພາບລູກສັດນ້ອຍທີ່ຢູ່ພາຍໃຕ້ການເບິ່ງແຍງຂອງພະນັກງານພວກເຮົາ ຫລື ໃນເມື່ອພະນັກງານ ຫລື ອາສາສະໝັກສັດຕະວະແພດກຳລັງມີການສຳຜັດກັບສັດ. ເປັນຫຍັງຈຶ່ງບໍ່ໃຫ້ແຊຣ໌ຮູບພາບ?
ເມື່ອຄົນເຫັນເຂົາເຈົ້າສຳຜັດກັບສັດອາດເຂົ້າໃຈວ່າ "ຫຼິ້ນ" ກັບສັດປ່າ ສະນັ້ນ, ອາດເປັນການບົ່ງບອກໄດ້ວ່າມັນບໍ່ເປັນຫຍັງທີ່ຈະ "ຫຼິ້ນ" ຫລື ສຳຜັດກັບສັດປ່າ. ການຄ້າສັດປ່າທີ່ຜິດກົດໝາຍເກີດຂຶ້ນມາຈາກຄວາມຕ້ອງການ ແລະ ຄົນຕ້ອງການສັດປ່າມາເປັນສັດລ້ຽງ ຫລື ເຮັດທຸລະກິດຕ່າງໆ ໂດຍຮູ້ວ່າເຂົາເຈົ້າສາມາດສ້າງກຳໄລໄດ້ຈາກການໃຫ້ນັກທ່ອງທ່ຽວສຳຜັດກັບສັດ ມີແຕ່ຈະສົ່ງຜົນເຮັດໃຫ້ທຸກຢ່າງຮ້າຍແຮງກວ່າເກົ່າເທົ່ານັ້ນ.